Tumatawang parang walang problema
Nakangiti na tila’y walang pangamba
Umaawit, sumasayaw, naghahatid saya
Nagpapayo, nakikinig, nagbibigay pag-asa

Araw-araw sa akin, ‘yan ang nakikita
Minsan rin nga’y, banggit pa nila:
“Sa buhay mong sapat, nakaka-inggit ka
Sana ang Diyos ay pagpalain ka pa.”

Pero ang totoo, kung alam lang nila
Marami akong sugat, na hindi nakikita
Dahil na rin siguro, ako’y nahihiya
Na tunay at lubusang, ako’y makilala

Subalit kapag ikaw na ang aking kasama
Wala akong takot, maski pangamba
Ang totoong ako’y payapang humihinga
Dahil sayo mahal, wala akong maskara